«قازمەديا ورتالىعىندا» ەلىمىزدەگى بۇقارالىق اقپارات قۇرالدارىنا ارنالعان «Astana Media Week» اپتالىعى باستالدى. جيىن اقپارات جانە كوممۋنيكاتسيا مينيسترلىگىنىڭ ۇيىتقى بولۋىمەن قازاقستاننىڭ رۋحاني جاڭعىرۋىنىڭ نەگىزگى باسىمدىقتارىن ورىنداۋ ماقساتىندا ۇيىمداستىرىلدى.
مەديا اپتالىقتىڭ اشىلۋ سالتاناتىندا كىرىسپە ءسوزىن سويلەگەن اقپارات جانە كوممۋنيكاتسيا ءمينيسترى داۋرەن اباەۆ تۇڭعىش رەت ءوتىپ وتىرعان مۇنداي شارا ەلدەگى مەديا نارىعىن قالىپتاستىرۋعا جانە دامىتۋعا قوسار ۇلەسى زور ەكەنىن ايتتى.
«ەلباسى نۇرسۇلتان نازارباەۆتىڭ ارنايى تاپسىرماسىمەن سالىنعان «قازمەديا ورتالىعى» الداعى ۋاقىتتا ايماقتاعى ىقپالدى مەديا حاب رەتىندە ۇلكەن ءرول اتقارماق. «Astana Media Week» وسى ورتالىق اياسىنداعى بىرەگەي مەديا الاڭعا اينالادى دەپ سەنەمىز. بۇگىنگى شارانىڭ باستى ماقساتى وتاندىق نارىقتى دامىتۋدان بولەك, مادەني جانە اقپاراتتىق بايلانىستاردى تەرەڭدەتۋ», – دەدى د.اباەۆ.
بىرنەشە كۇنگە سوزىلاتىن جيىن بارىسىندا تسيفرلى تەحنولوگيالاردى دامىتۋ, وڭىرلىك باق-تىڭ ماسەلەلەرى تالقىلانادى. ءمينيستردىڭ ايتۋىنشا, مۇنداي جيىندار قاتىسۋشىلارعا وزىق تاجىريبەلەرمەن تانىسىپ, شەبەرلىك شىڭداۋعا جانە جاڭا تەحنولوگيالاردى ەل يگىلىگىنە پايدالانۋعا بەرىلگەن ۇلكەن مۇمكىندىك. سونىمەن قاتار, د.اباەۆ ءىس-شارانىڭ وڭىرلىك كوممۋنيكاتسيالاردى, مەديا سالاسىنداعى سەرىكتەستىك قاتىناستار مەن حالىقارالىق ىنتىماقتاستىقتى دامىتۋعا ەلەۋلى ۇلەس قوساتىنىنا سەنىم ءبىلدىردى.
مەديا اپتالىقتىڭ العاشقى كۇنى ەفير تاراتاتىن مەديا وكىلدەرىنە ارنالعان. وندا مەديا ءوندىرىستىڭ كەلەشەگىن تالقىلانىپ, ديالوگ پەن كەلىسسوزدەر الاڭى, بىرقاتار ماستەر-كلاستار وتكىزىلىپ, پانەلدى پىكىرتالاستار وتەدى. جيىننىڭ ەكىنشى كۇنى Astana Digital Forum دەگەن جالپى اتاۋمەن تسيفرلى ماركەتينگ قۇرالدارى, كريپتوۆاليۋتا نارىعىنا شولۋ سەكىلدى بىرقاتار ماسەلەلەر جونىندە پىكىر الماسىپ, سپيكەرلەر ءسوز سويلەيدى. مەديا اپتالىقتىڭ سوڭعى كۇنى اقپارات جانە كوممۋنيكاتسيالار مينيسترلىگى باسپا نارىعىنىڭ دامۋىنىڭ ەڭ وتكىر ماسەلەلەرىن, جاڭا كونۆەرگەنتتى تۇرگە ءوتۋ كەزىندەگى قيىندىقتار مەن مۇمكىندىكتەردى تالقىلايتىن باق-تىڭ وڭىرلىك فورۋمى وتەدى.
اباي اسانكەلدى ۇلى,
«ەگەمەن قازاقستان»